Curdin

Biography

Avant var 15 onns fascheva Curdin Brugger anc part dals Passiunai, la fitg populara gruppa tuatschina. Cun l'emigraziun da Pascal Gamboni en Engalterra ha però quest chapitel da rock rumantsch prendì ina fin. Curdin s'ha lura deditgà en emprima lingia a famiglia e fatschenta, surpigliond a Sedrun il hotel dals geniturs. Ma la musica n'ha el betg laschà d'ina vart. Sco fan da la ghitarra acustica ha el perfecziunà sin l'instrument tecnicas da finger-picking ed emprendì da sunar cun accordaziuns avertas, scrivend magari er qua u là ina nova chanzun. Ina da questas preschenta Curdin Brugger uss sco 36avel Top Pop Rumantsch - in pitschen folksong cun melodia simpla ed in bel refrain tschivlà a la moda da Bobby McFerrin. En quest grà tunan er messadi e titel da la chanzun “Fidonza”. Il bass ha dal reminent sunà Pascal Gamboni, chaschunond uschia ina pitschna reunificaziun dals Passiunai. D'udir exclusivamain sin Radio Rumantsch.