Walliser Müüsig:
Drii Tubaner, oder Trubadurs, oder Trubadandu, wiä öi immer das heisst. Uf jedu Fall drii Müsiker üsum grossu Nachbarskanton vo Bäru machent an dem wundervollu
Oktoberabund du Schritt uf d'anner Sita vom Lötschbärg. Wiär lüäge insgsammt uf nit weniger als 44 Jahr müsikalischus Schaffu iner wohl schönschtu Landessprach voner Schwiz zrugg – Wallisertitsch. (44 = Schnapszahl = öi nit schlächt.)
Der eintu, der Jea-Mi, isch än Seema! Mit schiiner Band "Walliser Seema" (und vorer mim "Personal") macht är scho 16 Jahr Müüsig. Mit Tuba, Giiga, Ukulele und Gitar isch die Band sehr speziell, verbindut so eppis wiä der Südu vom Wallis mit orientalischum Klimbim. Är singt uf Dialäkt, aber het schiini Platta öi gat uf Französisch üfgnu, so à la "än witeri Landessprach wo iisch doch sehr nooch isch."
Der neegschtu, der Mike, isch än Walliser-Mundartrocker, wo mit schiiner Band "eppis" (ja das heisst "öppis" uf Bärndütsch und ja, das isch än gottlos doofe Bandnamu) sit meh als fufzäh Jahr unnerwäx isch. Är het mal uf änglisch probiärt, aber z'Wallisertitsch geit mu de doch vil besser. Vor allum ver z'schriibu, wiäner seit. Uf jedu Fall rockt är gäru di Bühna, macht aber öi vil uf unplugged – sogenannti Liäderabunda mit Stimm, Gitar und Looper.
Der jungschtu iner Rundi isch z'Töbi und het z'Hew ufer gliichu Bühna wiä der vorer – Är macht Rock! 2008 agfangu bliibt är mit schiiner Band dum Bandnamu tröi: "Üsserorts". Är representiärt iische wundervoll Dialäkt öi ab und züä iner annersprachigu Schwiz, also im hibschu Kanton Bäru und bi de andru Büänzlini.
Üsserdem het är mit schiinum jugendlichu Elan der Hüüfu vom Oberwalliser Mundartnetzwerk zämu. Müüsiker und Organisationischt – Än geile Siäch..
Grüäss voner Walliser Delegation..
Walliser Seema
eppis
Üsserorts

KulturBistro - Karl Schenk: Kultur ist, was der Mensch selbst gestaltend hervorbringt. Wir bieten eine kleine Bühne – einen Raum – der vieles möglich macht. Talks, Lesungen, Schauspiel, Stand-up-Comedy, oder musikalische Momente der kleinen und persönlichen Sorte. Ob Profi oder Laie – hier gefällt, was dem Publikum Spass macht. Wenn nicht hier, wo denn sonst?