Liabi verstaubti Gummistiefel-Bsitzer, 24er-Landi-PET-Biar-Horter, Toi-Toi- Experience-Nostalgiker, Stimmband-Schoner und Stuba-Hocker-statt-First-Row-Rocker,

Vermissisch du d’Festival Saison bereits au schu so fest, dass din Camping-Stuahl and Quartiarstross gstellt hesch und alles kommentiarsch was verbi lauft, din gelbi Landi Regamantel und dia passenda Gummistiefel, bereits bim letschta Regaguss im Schlamm gwendet hesch und alles Griffbereit im Igang hängt, dr Uf- und Abbau vum Zelt zigg mol timet hesch mitra Augabinda uf und 2 Promill im Bluat, ds Biar afäng ir Sunna ligga losch anstatt in Küahlschrank stellsch und dass d’Duschi nurno uf kalt und uf es paar Tröpfli pro Minuta gstellt hesch?

Denn hend miar dia erlösendi Nochricht für di! Z fids-Fescht in da Steina goht in dia ersti Rundi! Vum 6. – 8. August 2021 verwöhnen miar eu mit lokaler Musig, ra gmüatlicha Atmosphära, herzlicha Menscha und guatem, selbergmachtem Gaumaschmaus. Ds Festival stellt nit nur regionali Klikünstler im gmüatlicha Ambiente ins Zentrum, sondern bütet neba dem ganz vieli Möglichkeita zum uf dummi Gedanka ko, ds innera Kind usleba und guati neui Menscha z treffa.