11avel Top Pop Rumantsch - tuns da cool girl
«Laschar ir» - quai è il titel dal indeschavel Top Pop Rumantsch. Scrit ed interpretà da Bianca Mayer, musicista universala da Scuol. D’udir exclusiv al Radio Rumantsch.
Bianca Mayer nun è il tip da las emoziuns stravagantas, ella è ni l’animal dal palc ni la dultschinea cun arias da musicstar. Quai na munta dentant ch’ella nun amia la musica, anzi, Bianca viva la musica di per di. E quai en ina varietad nunditga, ella è buna da sunar la bunura orgels en baselgia e la saira batteria en in tschaler da rock, ella scriva oz soundtracks per films e maina damaun lavuratoris per bands novizas, e quai pendulond sco ina furmicla tranter Scuol e Turitg. Ma tut quai fa ella senza tutgar ils zains gronds. Ed en quest purtret quadra detg bain la chanzun che Bianca Mayer ha proponì per la retscha dal Top Pop Rumantsch - ina chanzun suttemprada, tecnoida, che trai endament cun sia ritmica renitenta e sia melodia circulara ils megliers onns dals Depeche Mode. E tut questa «coolness» be per zuppentar in vag mal d’amur, in mal da la vita, in temp che na vul passar. E per exprimer la finala la brama da simplamain pudair «laschar ir».
Cumposiziun e text: Bianca Mayer
Producziun & instruments: Manfred Zazzi & Bianca Mayer
laschar ir
las uras nu passan
cur chi vessan da passar
cur chi nu füss da stübgiar e simplamaing far
ma nu's riva davent
e mincha secunda arda
sco auoglias tras e tras
ün cumbat tanter tai e l'eternità
ref:
less ir davent da quia
inclur bel e chodin
ingiò ch'ingün impissamaint po tradir
ch'eu sun vi dal patir
e na buna da laschar ir
eir sch'aint la creppa esa cler
meis cour resta creppun
chi'm vegn a dar ün schleppun
ch'eu poss star sü ed ir
quant lönch as poja esser debel
stüppid e curius?
e na trar üna decisiun
per quai chi füss bun
perche la forza füss adüna quia
cul temp vegna melder
ma il temp nu voul passar...
Bianca Mayer è naschida a Scuol e creschida si là en in ambient fitg musical; suenter la matura ha ella studegià clavazzin al conservatori da Turitg, enritgond ils studis cun uras da jazz. Sia emprima band ha ella gì cun 16 onns; oz suna ella batteria en in trio da dunnas. Il 2003 ha Bianca participà a l’entupada musicala rumantscha-valisica «Cara», e tranter sias lavurs recentas figurescha l’assistenza al soundtrack dal film «Vitus» da Fredi Murer. Sper las lecziuns da clavazzin dat Bianca Mayer er workshops per bands. Dacurt ha ella scrit ina chanzun per il quartet vocalic ladin 4 For You.
Top Pop Rumantsch - in label per purschidas innovativas ed unicas en il program da musica da RR. Per l’atun 2007 è planisada ina cumpilaziun da la retscha.
