deutsch/english: bulais.ch!
La band
Ils „bulais“ sun üna band rumantscha da rock, fuormada intuorn Olivier Pernet e Corsin Bisaz. Ils texts da las chanzuns sun tuots rumantschs – ils “bulais” toccan daspö divers ons pro la „crème“ da la scena da la musica rumantscha da rock.
L’istorgia
La band es gnüda fundada da l’on 1992 cun il nom “bulais sexuals”, a la testa d’eiran tschinch gimnasiasts da l’Institut otalpin Ftan. A partir da quel mumaint ha dat la band numerus concerts in Svizra ed i’l exteriur cunfinant. Ils “bulais” han registrà duos singles, trais albums ed ün clip da video. Alchüns da lur concerts sun gnüts registrats live dal Radio Rumantsch. Ils concerts e las registraziuns han tschüf trasoura buna criticas illas medias.
Il nom
Hoz as nomna la band be plü “bulais”. Quella müdada ha stuvü gnir fatta, perquai cha’l nom vegl gniva inclet illa Svizra tudais-cha tuottafat oter co illa Rumantschia. Rumantschas e Rumantschs colliaivan il nom cun adjectivs sco “simpatic, divertent, original”, intant cha persunas da lingua tudais-cha – dasper difficultats da pronunzcha à l’inglaisa – faivan tuot otras associaziuns e vaivan tuot otras aspettativas musicalas chi tiran forsa adimmaint ils “Sex Pistols”. Perquai be amo “bulais” – e basta.
La musica
Il stil da musica special dal “bulais” as cumpuona da rock ed elemaints da jazz, blues e soul, ed algorda al rock da “mundart” da diversas bands svizras. Ils texts sun però exclusivamaing rumantschs, quai chi dà a la musica amo supplementarmaing üna nota exotica. La musica parta dal piano e vain sustgnüda dad instrumaints da flà (saxofon e trumbetta) sco eir dad üna guitarra bluesesca. Il chant algorda a Joe Cocker ed a Herbert Grönemeyer. La fundamainta groovusa dan la batteria ed il bass. E na d’invlidar, ils “bulais” han simplamaing ün plaschairun enorm da far musica, saja quai pro las prouvas o pro’ls concerts.
Statement
”Dasper il plaschair vi da la musica vaina eir böts ideals: Nus lain muossar cha la lingua rumantscha nun es be da chattar in bibliotecas anticas e sün sgrafits, mabain ch’ella viva – e co!
“Scha la lingua rumantscha dess surviver, sto gnir amegldrà seis image impustüt pro la generaziun giuvna. Nus sperain da pudair contribuir cun nossa musica almain per part ad ün purtret modern da nossa lingua – dimena da far promoziun da lingua in möd insolit, ma sco cha nus crajain in möd efficazi.
