Davo dudesch ons ha la gruppa jaura «Diabolics», registrà il seguond disc compact. «Nus vain simplamaing gnü ün temp plü quiet», quinta il chantadur Ivan Zangerle. Ma uossa dan els gas cul battaisem dal disc a Fuldera.
«Meis cour sbraja ed arda sainza fin, per mincha mumaint cha tü nun esch quà», pudessan vairamang chantar ils fans da la gruppa da rock rumantsch jaura «Diabolics», chi han stuvü spettar dudesch ons sül seguond disc compact. Ed uossa ha il spettar tantüna chattà üna fin. Ils Diabolics preschaintan lur nouv’ouvra «Bandunà» cun nouv chanzuns da rock jauer chi garantischan fingià ouravant da gnir ün success. Impustüt la ballada d’amur «Sta pro mai», chi quinta co cha’l cour sbraja ed arda per mincha mumaint cha l’adurada nun es quà. E bainbod as dodarà quista chanzun tuot las uras süls emettuors illa regiun. Sco cha Ivan Zangerle, chi chanta e suna la guitarra ritmica, quinta, nun es l’amur l’unic tema sül nouv disc compact. «Nus chantain sur da tuot quai chi’ns occupa e sur da noss’experienza da vita.» Ed uschè han els registrà chanzuns sur da raps, cumüns, anguels e dafatta sur da la Guerra da Chalavaina. Culs duos tocs «Reggae Man» e «Roselina» survain il disc compact dafatta ün pa ajer internaziunal e la Val Müstair vain plü daspera dal rest da muond.
Fuormà la scena da rock rumantsch
Ils tschinch jauers s’han chattats dal 1996 la prüma jada musicalmaing. E davo paccas prouvas, han Ivan Zangerle, Johnny Peterelli (guitarra da solo), Martina Marcona (synthesizer), Adom Moser (battaria) e quella jada amo Paulin Oswald (bass), sunà la prüma jada publicamaing in occasiun da l’exposiziun da la mansteranza in Val Müstair. Dal 1998 ha rimplazzà Arno Forrer il bassist. E quel on es eir cumparü il disc compact «Do la glüna» culla cuntschainta ballada d’amur «Jau t’ha n’ha jent». La carriera dals musicants jauers es in seguit statta stipa ed els han sunà e chantà in seguit a differents concerts da rock ed open-airs in tuot la Svizra. Ils Diabolics sun dafatta stats a singuls concerts la pregruppa da «Natasha» e «Göla». Il punct culminant es per Ivan Zangerle stat il concert in occasiun dal Open Air Val Lumnezia. «Quia regna simplamaing ün’atmosfera tuot speciala», s’allgorda il chantadur dals temps passats. Ed els han dominà e fuormà sur lung temp la scena da rock rumantsch. In seguit han ils Diabolics tut ün pa plü pachific, sun però adüna restats insembel. «Nus vain simplamaing gnü üna fasa plü quieta cun maximalmaing ün fin duos concerts l’on». Els s’han concentrats plü ferm sün scolaziuns, manster e famiglia.
Far musica our da plaschair
Dürant quista fasa han els cumanzà a chantar eir covers ed Ivan Zangerle ha adüna darcheu portà nouvs texts e nouvas melodias illa gruppa. Insembel han els lura elavurà quistas ideas a chanzuns cumplettas. «Il giavüsch da registrar ün nouv disc cumpact vaina fingià daspö ün ter temp», quinta Zangerle. Il motiv dal disc d’eira impustüt eir quel per pudair registrar, respectivamaing archivar, las aignas chanzuns. E perquai porta il nouv disc compact üna collecziun da las megldras chanzuns dals ultims dudesch ons. E quellas domineschan cul cuntschaint stil dals Diabolics cun chant jauer e parts solisticas da guitarra e clavazin
La band es dürant tuot quists ons creschüda amo plü ferm insembel, ed i’s bada eir, sco cha Zangerle disch, ch’els han fat tras bler insembel. Ils temas e la simbolica sun gnüdas plü chafuollas e listess vöglian els, «viver oura il esser kindel.» Las ambiziuns dals Diabolics restan moderadas ed els vöglian simplamaing far musica our da plaschair.
