Flavio Troubadour

Biography

"So wie wiemer sind und besinnlichi Musig gnüüse," luutet am Flavio Troubadour sis Motto. De selbsternannti Liedermacher, Musigtherapeut und Zeremoniemeister singt Gschichte uf Züridütsch. Mit poetische Text und ere sanfte Stimm besingt er die mänschlich Verletzlichkeit. Sini Lieder sind dademit e tröstendi und erfrischendi Antwort uf e zersplitterti, postmoderni Welt.

Sini Lieder begleitet de Flavio sälber uf de Gitarre und mit ere Mundharmonika. Er füert dademit t Tradition vode Liedermacher und Troubadoure wiiter. Die gaht zrug bis is Mittelalter und hät ide 1960er-Jahr mitem Bob Dylan und em Mani Matter e Renaissance erläbt. Am Flavio sini Musig läbt vode Intimität: Er tritt meistens a chline, ruhige Ört uf.

Als Chind hät de Flavio wele Sänger und Erfinder werde. Als Jungetliche hät er t Gitarre entdeckt und hät t Lieder vo grosse Liedermacher afa spiele: Vor allem vom Bob Dylan, vom Mani Matter und vo Italienische Liedermacher wie em Fabrizio de Andrè, Francesco de Gregori oder em Lucio Dalla. Gedanklich begleitet ihn sit sine Jugend t Philosophie vode Läbeskunst, vom Buddhismus und vom Existenzialismus. All die musikalische und philosophische Pol präged sis Schaffe bis hüt.