L’istorgia da las Liricas Analas cumenza insaco la primavaira dal 2000 cun l’entupada da dus giuvenots sursilvans che resentivan il gust da translatar en rap lur passiun per la cultura da hiphop. Uschia è naschì l’emprim rapsong rumantsch „il tren da Sedrun“. A partir da qua èsi stà cler, ch’i dat anc adina speranzas per la cultura giuvenila rumantscha e che quella n’ha betg basegn da pseudoprojects subvenziunads dal stadi per restar en vita. La muribunda dueva sortir sc’in Phönix or da las tschendras e dar ina bella pajad‘al tgil a la Rumantschia – en furma da las Liricas Analas. Ma avant ch’i saja usché lunsch han ils dus giuvens survegnì in suenter l’auter cumpagnia da trais conspirads. Ed uschia èsi capità che la furmaziun consista anc oz dals medems tschintg mc’s da lezs dis, numnadamain: orange, spoon, pddp, just e flepp. Suenter ina lunga stgarsezza da dj’s ha in indigen emigrà antruras en Engalterra chattà la via enavos a chasa e vi dals MK2 da las Liricas Analas. In segund dueva lura anc cumparair, dal qual la via e la motivaziun da s’unir sa la truppa èn anc oz nuncleras (el deriva da Winterthur). Uschia saja: suit e gionson furman dapi lura l’artilleria ritmica da las Liricas Analas. Ils 27 da december da l’onn 2001 èn ils giuvens arrivads a Dieni, per celebrar là en la R5 lur emprim concert. Il resultat è stà ina sairada reussida, pachetada plaina cun rap. Ed uschia ha l’istorgia piglià ses curs. In concert suenter l’auter, ed anc avant ch’ils giuvens s’accorschian, stevan els tuttenina sin las tribunas dal open air Val Lumnezia, da l’expo02, dal Langstrassenfest (Helvetiaplatz), dal Riders-Palace, pèr a pèr cun Stress, Greis, Kuchikäschtli ed autras bands. La resonanza a la musica da las Liricas Analas era gronda, ed uschia ha quel trup da provincials rappagiants da la Surselva decidì da publitgar in portatun. D’in pèr dis lavur da studio è naschì il primalbum „Analogia”, ch’è lura vegnì battegià ils 28 da favrer 2004 a Mustér. In solid emprim crap era oramai mess en il fundament da la truppa e l’istorgia da las Liricas pudeva cuntinuar. Suenter nundumbraivels concerts en Svizra sco er divers featurings hospitants sin albums esters (p.ex. Gimma, Amplified, Milchmaa, QRCT) è la nova creativitad culada en il segund album „AnalFaBad”. Cun quella publicaziun e l’emprima girada d’in videoclip vegn l’istorgia ad ir vinavant ses gir, faschond rockegiar las Liricas anc inquala parada en lur moda nuncunfundibla. Explicit, hardcore ... rumantsch! ...
