Itz bini scho fasch 30 Aute
Itz chumi langsam i ds Auter wo i merke, ds i nüm ewig lebä
Und i frage mi, ws hingerlah i, we i gah?
Ws nimmi mit und was bliibt hie we i mou nüm hie bliibe?
Weli Spure? Was wird mis Vermächtnis si?

Ig ha lang uf dä Momänt gwartet, iz ischer do
Ig hätt nie dänkt ds ig mau sowyt wirde cho
Ig hätt nie dänkt us mir wird so e grossi Gschicht
Ds i Lüüt is Läbe sprich mit mine Gedicht
Was löh mer da wemer göh? Tate zeue
Ig bi Poet, ig bi cho zum frage steue
U i frage mi, was wirdi hingerlah, we i mou gah?
Doch i merke haut, wart, ds isch di fautschi Frag!

Mis Vermächtnis entsteit nid ersch denn weni tot bi
I wott öpis wytergäh, solang i no do bi
Denn uf mim ganze Wäg ha ig immer mini Wärte gha
Si hei mi prägt, mi u mi ganz Wärdegang
Nächste Liebi, Hiufsbereitschaft, Loyalität u Tröii
U we dr öpis guets passiert, denn fröi di
Sig dankbar fürs Guete, oh am dunkelste Tag
Oh am dunkelste Tag het ds Läbe viu Guets parat

Kei Mönsch isch dankbar und verbittert zuglich
U du chasch hüt entscheide weles ds du wosch si
Nei, s glingt oh mir nid geng mini Wärte ds läbe
Ziemlich oft geit mir ziemlich vieles dernäbe
Doch bi Wärte geits nid um Perfektion
Nid jedes Detail muess perfekt si fürne guete Rezension
Wichtig isch dini Hautig und dr Output
Überleg dr mou ws ah dire Beerdigung wohl vorchunt

Doch zu viil Selbstkritik cha ganz schön ah di Niere gah
Sig bamzhegig u gnädig u fang mit dir säuber ah
Ig ha mi entschiide dankbar si für Bett u gfüllte Täuer
Genauso hani mi entschiide ds friide si mit mir säuber
Doch trotzdem mi kritisch ds hinterfrage
Ig ha glehrt dr Blick i mis Innerste öfters ds wage
Bi vielem woni dert gseh, luegi lieber wäg
Ds isch abr fausch denn Ehrlichkeit isch mi Wärt

Und Ehrlichkeit faht ah dermit ds i mi nid säuber alüge
Zvill Mönsche wo sich us Angst säuber betrüge
Ds lohnt sich nid, denn irgendeinisch chunt aues ahs Licht
Wenn scho weisch ws chunt denn isch dä Schriit licht
Ig reflektiere zwar mi säuber mit däm Lied
Aber bi ehrlich dr Meinig di Message hets verdient
Ds ig ds Lied nid nume für mi säuber schriibe
Ohni ds i übertriibe, ig hoffe s wird dir öpis bliibe

Denn ig beschriibe hie gad mini Vorstellig vo mim Vermächtnis
Wele Wärt hätti ds, bliibst niemerem im Gedächtnis
Ig wott di nächsti Generation mit genau denä Wort präge
Mit mine Wärte Leitplanke setze uf ihrne Wäge
Tue di fest verwurzle aber griff nach de Stärne
Di gliiche Fähler müesse nid wyter gmacht wärde
Drum söu di Message i däm Lied di Autag färbe
Vor Geburt bis zum Stärbe, dis ganze Si uf derä Ärde

Villech darf i nid dr Aspruch ha ds mir öper gloubt
Di Wort ghört und drum sis Läbe umbout
Abr tröime isch erloubt, und faus mir öper so fest vertrout
Ob Maa odr Frou, hett ds für mi meh wärt als Gold
Denn ig redä nid abe vom ne höche Thron
Sondern uf Augehöhi und drum ärnti oh Spott u Hohn
Vo teune Lüüt doch s isch u bliibt mi grösst Lohn
We sech Mönsche vo mir löh la bewege u damit zeige ds sechs lohnt

Genau ds söu wes nach mir geit mis Vermächtnis si
Bewegti Mönsche, zu guetem Läbe neu ermächtigt
Dür mini Musik, mini Gschichte, mini Texte
Nid unersetzlich aber hiufriich ufem Wäg zum Beste
Doch s geit um meh aus nume mini Texte und Lieder
S geit um mi als Person, und klar mir lieber
Me misst mi usschliislich ah mim veröffentlichte Wärk
Aber wi scho igangs erwähnt, s geit letzlich um mini Wärt

Mini Wärt läbe nid nume i mine Wärk, sondern präge mi als Mönsch
Und denn fliesst öpis dervo wyter, we du mi kennsch
Ig cha u muess nid perfekt si, aber druf bedacht
Denn ih wär nid dr erst wo öpis anders seit als är denn macht
Ja, mi letzt hie agsprochnig Wärt isch Authentizität
Denn sie isch für mi zentral, e Teil vo mire Identität
Denn dr grösst Wärt het ke Wärt ohni Authentizität
Ohni si isch aues nüet, de lani ds Blatt lieber läär

U so chumi zum Schluss ds ig no lang nid am Ändi bi
Mis Vermächtnis cha ig no täglich verändere
Ig cha säuber bestimmte i weli Richtig ds s söu gah
U gliichzitig hoffi ih ha scho ize mini Spure hingerlah