New York 1969, Ben erblickt ds Licht vor Wäut
Är het e schöni Chindheit, giit nüt wo ihm fäuht
Wachst uf in Manhattan, het e gueti Family
Di ganzi Hippie Bewegig zieht schadlos verbi
Sini Eutere gseh ihn ir Politik oder als Arzt
Aber irgendwie isch ds vo ihm usgseh nid das
Wo är sich vorstellt, ds isch ihm zu normau
Är wott Action ha, am beste richtig brutau

Zersch muess er di längwilligi Schueh abschliesse
Scho denn tröimt är vom ne Läbe mit Granate u Schiesse
S Läbe vouer Adrelanin u Spannig, nid so gfahrlos
S itzige Läbe isch längwilig, meh besteits planlos
Ben vergnüegt sech nur zur Ablenkig mit Froue
Doch s giit keini wo für meh schiints touge
I sini Ouge isch ds Läbe nie so wärtvou
Wi we eim dr Tod jede Momänt gad wäg hout

Drum tritt Ben 1989 dr Army bi
Erfahrt dert wi hert ds Läbe so cha si
Doch oh ws wahri Kameradschaft bedüütet
U innerlech fröit är sich wes im Panzer mou rüütlet
Ufem Üebigsgländ, den ds isch leider klar,
Wöu er als Rekrut no nid i di wahre Schlachte darf
Kei Messlatte u ke Üebig het vor ihm bestang
Är ghört zu de Beste im ganze Jahrgang

Aber irgendwen het är di ganze Üebige gseh
Är seit zu sine Kamerade, är wett meh
Wätt für öpis richtigs kämpfe, Leid beeände
I frömde Länder Diktatore stürze wo d Mönsche bedränge
Ändi 1990 änderet sech d Grosswätterlag
Dr Dude im Irak benimmt sech nüme so brav
Nid ds dr Ben viu vo Politik würd verstah
Aber er wott iz ändlich si erst Isatz ha

Im Januar 91 isches denne so wyt
Dr Kongräss beschliesst: „Mir beeände dä Stritt
Mitem Sadam, denn dä geit für Öl über Liiche
Ds müessemer beschütze für di westliche Riiche“
Ben bechunt dr Befehl, gli verlaht är sis Heimatland
Dr Zielort isch im ehrlich gseit nid bekannt
Är geit no einisch verbi bi sire Mom u sim Dad
Di hei ne verstande aber immer gstärkt

I derä Nacht geit är no bire Nutte verbi
Si machts nie ohni Gummi ussert für ihn
Für ihn isches no einisch Sex, wyter nüet
Är wird nie erfahre, ds är i derä Nacht e Tochter züügt

Paar Stung spöter verlaht Ben sis gliebte Amerika
Zrugg cho wird är scho wyder ines paar Tag
Ben wird in Saudi Arabie stationiert
Als Schutz, faus dr Irak e Agriff probiert
U tatsächlich laht dä Agriff nid lang uf sich warte
Ben stirbt ir Kaserne mit 27 Kamerade
Immerhin, är het immer als Soldat wöue stärbe
Ben zu Äsche, Äsche zu Stoub, Stoub zu Ärde