Im Jahr 2009 hei mir beidi aagfange üsi Emotione ufenes Blatt Papier z’schribe. Usgrüschtet mit Headset, Free-Download-Beat und mitemne Cubase hei mir üsi Texte ändlech chönne zu Songs verwandle. Bis im Jahr 2012/2013 hei mir Songs gmacht, um üs lyrisch und musikalisch z’verbessere, sodass mir üse Stil hei chönne finde.
2013 hei mir üs zämetah, um äs gmeinsams Aubum z’erschaffe. Gfougt vo einige Uftritte hei mir üs wieder de Solo-Projekt gwidmet. De Steve Kali het sech voukomme uf d’Lyrik und d’Melodik fokussiert und isch ufgrund sine Texte und sine Beats 2017 füre Waldbühne-Contest nominiert worde, während Raffi P äs Färnstudium bir Hofa us Audio Engineer erfougriich het absolviert.
Aafangs 2018 hei mir üs erneut zämetah, um äs nöis Aubum z’erschaffe, mit de Songideeä vom Steve Kali und dr klangspezifische Bearbeitig vom Raffi P. Drus entstande isch Team AURORA. Jedä Song isch bunt/farbig. Z’Spektrum vom nöie Aubum AURORA isch gross, da soviu Genres i jedes Lied inefliesse u jedes Lied o äs angers Genre bedient. Kategorisiert si d’Lieder ungerem Genre „Atmo-Rap“. D’Beats si atmosphärisch und harmonisch. D’Lyrik spiut derbii ä tragendi Roue u dient aus Verbiudlichung. De Rapstil isch metaphorisch, sodass de Zuehörer sech ds Ganze biudlech cha vorsteue. Witeri Projekt stöh a und es wird no viu nöii Musik gmacht wärde.
