Tobak

Biografia

Tobak lehrt loufe!
Äs isch lang här wo sech dr Marco Tobaco u der Hans Loft imene verrouchte Üebigschäuer namens U-Room hei lehre kene. Vo afang ah hets musikalisch wie ou mönschlech guet funktioniert zwüsche dene beidne. Mi het sech äs paarmou bim tschäme troffe u hät scho den gärn äs Projekt zäme gha. Da aber jede mit sim eigete Projekt vou beschäftiget isch gsi, isches bi dene paarmou tschäme blibe.

Nach äs paar Jahr funkstiui hei sech die zweh de glich no gfunge. Mi het mit verschidene Bandprojekt, ä Durststrecki vo mererne tusig Kilometer zrüggleit, bevor me aues vorhandene über Bord gschosse u aui die Lieder füre gno het wo nie hätte söue ufene CD presst wärde. Und siehe da!! Tobak isch gebore.

Tobak si spitzbubige Texte mit für „Mundart“ exotischere Musig. Angers gseit isch äs grobe Tobak und nüt für Lüt wo sech nid mit Themene wie Sex, Droge u schnäue Outos wei usenangsetzte.

Jetz geit aues so schnäu dass mir langsame Bärner fasch nid nachemöge mit gniesse. Chum isch Tobak usem Ei, scho isch glägeheit cho äs Aubum ds’produziere. Gesagt getan u Brätsch, Päng das Aubum ligt ufem Tisch. Mit der nötige Mithiuf vo ganz viune guete Lüt isch die CD im Intenet zum achesugge aber ou i de verschidenste CD-Läde vor Schwiz erhäutlech.